სიახლეები

ხრიკები, რომლებსაც შეფ-მზარეულები სამზარეულოში იყენებენ

1. თუ გინდათ, რომ ბრინჯი ქათქათა თეთრი იყოს, ხარშვის დროს, ცოტა ძმარი დაამატეთ.
2. იმისთვის, რომ კერძს ნივრის პიკანტური გემო მიანიჭოთ, გაჭერით 1 კბილი ნიორი და თეფშის ზედაპირს წაუსვით, ხოლო შემდეგ, მოათავსეთ სალათი ან გარნირი.
3. განსაკუთრებულ გემოს ანიჭებს ხორცის მარინადს შავი ლუდი ან ღია ფერის ლუდისა და სოიოს სოუსის ნაზავი. ლუდი მარილთან და პილპილთან ერთად, საუკეთესო მარინადია გემრიელი ხორციანი კერძის მოსამზადებლად.

ლუდის დამატება ასევე შეიძლება მოთუშუ ბოსტნეულზე. აღსანიშნავია, რომ ის, განსაკუთრებულ გემოს და არომატს ანიჭებს მოხარშულ კარტოფილსაც.
4. ღვიძლს მარილი ბოლოს უნდა დაამატოთ, წინააღმდეგ შემთხვევაში, გამაგრდება. 
5. ღვეზელი ზემოდან რომ არ დაიწვას, ცხობის წინ, სველი საცხობი ქაღალდი დააფარეთ.
6. მოხარშული კვერცხი ლამაზად რომ დაჭრათ, დანის პირი ცივ წყალში დაასველეთ: კვერცხის გული აღარ დაიფხვნება.
7. ხარშვის დროს, ლობიო არ გაშავდება, თუ ქვაბს სახურავს არ დაახურებთ.
8. ფარში უფრო არომატული და გემრიელი იქნება, თუ მას ხახვის ერთ ნაწილს უმი, ხოლო მეორეს – მოთუშული სახით დაამატებთ, და უფრო გემრიელი იქნება, წვრილ სახეხზე, გახეხილი კარტოფილის დამატების შემთხვევაში.
9. მარილის ნაცვლად, დროდადრო, კერძებში ლიმონის წვენი გამოიყენეთ. შედეგად, თქვენ კერძს არ დაამლაშებთ, ხოლო ლიმონი მას ციტრუსი გემოს და დახვეწილ არომატს მიანიჭებს. გარდა ამისა, ეს სასარგებლოა ჯანმრთელობისთვის, კერძოდ – წნევის დარეგულირებისთვის. 
10. ბადრიჯანს სიმწარე რომ მოაცილოთ, დაჭერით კერძისათვის საჭირო ზომის ნაჭრებად, მოაყარეთ მარილი და ცოტა ხანი გააჩერეთ, რომ წვენი გამოუვიდეს. ამის შემდეგ, ცივი წყალი გადაავლეთ და გაწურეთ.
11. ნუშს კანი ადვილად მოსცილდება, თუ წყალში ჩაყრით და 5 წუთი ადუღებთ, ხოლო შემდეგ, ცივ წყალში გააგრილებთ.

12. თუ ყავას ხარშვის დროს, მწიკ მარილს დაამატებთ, ის ბევრად უფრო გემრიელი იქნება!
13. ღუმელში შემწვარ ხორცს, ოქროსფერი ქერქი რომ გადაეკრას, ზემოდან გადაუსვით ბროწეულის წვენი და თაფლი, განზავებული მშრალი ღვინით, კონიაკით ან წყლით.
14. თუ ხორცს დიდი ხნის მანძილზე ხარშავდით, დაჭერით თხელ ფენებად, დააწყეთ თეფშზე, მოაყარეთ დაჭრილი ხახვი და პომიდორი და მოასხით ცოტა ზეთი, ლიმონის წვენი და ძმარი. ხორცი ამის შემდეგ, წვნიანი და უფრო გემრიელი გახდება.
15. საფანელის ნაცვლად, დაფქული ნიგოზი გამოიყენეთ.
16. ახლადმომზადებულ ხორცს მაშინვე ნუ მიიტანთ სუფრაზე. ცოტა თუ გაგრილდება, ის გემოს სრულად გახსნის.
17. ვინეგრეტი უფრო გემრიელი იქნება, თუ 1 სუფრის კოვზ რძეს და 1 ჩაის კოვზ შაქარს დაამატებთ.
18. “ვაშლის შარლოტკაში" ვაშლი ფსკერზე არ დაილექება, თუ ცომში მოთავსების წინ, ფქვილში ამოავლებთ.
19. ვიდრე სუპს ცეცხლიდან გადმოდგავთ, დაამატეთ ცოტა ახლად გამოწურული ბოსტნეულის (კომბოსტო, სტაფილო, პომიდორი) წვენი. ეს გააძლიერებს მის გემოს და გაამდიდრებს კერძს ვიტამინებით.
20. ვანილი — საუკეთესო სანელებელია, რომელიც ბოსტნეულის სალათებს განსაკუთრებულ პიკანტურ არომატს ანიჭებს.

21. ბევრი ხერხი არსებობს, დამლაშებული წვნიანი კერძის გადასარჩენად. კერძოდ, მასში შეიძლება, დოლბანდში გამოკრული ბურღულეულის მოთავსება: ხარშვის დროს, ის ზედმეტ მარილს შეიწოვს.

22. თუ მომენტი გაუშვით, ხორცს ქაფი ვერ მოხადეთ და ის ქვაბის ძირზე დაეშვა, ერთი ჭიქა წყალი დაასხით და ქაფი ისევ ზემოთ ამოვა.
23. ღუმელში ხორცი რომ არ გამოშრეს ან არ დაიწვას, მასთან ერთად, წყალი მოათავსეთ, ცეცხლგამძლე ჭურჭლით.
24. ქათმის ბულიონი გემრიელი რომ იყოს, ხახვის და სტაფილოს გარდა, სხვა სანელებლები არ დაამატოთ, თორემ გემო დაეკარგება.
25. ქათმის ბულიონი გამჭვირვალე რომ იყოს, დუღილის დროს, 1 კუბიკი ყინული ჩაამატეთ
26. დაფნის ფოთოლი, კერძის მომზადების შემდეგ, მაშინვე უნდა ამოიღოთ, რომ მისი გემო არ გააფუჭოს.
27. სტეიკი უფრო გემრიელი რომ იყოს, შეწვის წინ, ძმარი და ზეთი წაუსვით და 1-2 საათი გააჩერეთ.
28. კოტლეტი, შეწვის პირველ წუთზე, მაღალ ცეცხლზე დადგით, რომ თავიდანვე გაუჩნდეს მაგარი ქერქი და წვენმა არ გამოჟონოს შეწვის დროს. ხოლო შემდეგ, ცეცხლს დაუწიეთ, როდესაც გადააბრუნებთ, ისევ მოუმატეთ ცეცხლს 30 წამით.
29. შეწვის დროს, თევზი რომ არ ჩაიშალოს, შეწვამდე ქაღალდის პირსაცოცით კარგად გაამშრალეთ, მარილი წაუსვით და 15 წუთით გააჩერეთ.

30. რაც უფრო წვრილად დაჭრით სოკოს, მით უფრო გემრიელი და არომატული იქნება კერძი.
31. რაც უფრო ძველია კარტოფილი, მით უფრო მეტი წყალი უნდა დაასხათ, მოხარშვის დროს.
32. შეწვის დროს, ცხიმი რომ არ იწუწებოდეს, ვიდრე შეწვას დაიწყებთ, ზეთში ცოტა მარილი მოაფიფქეთ და ამის შემდეგ დაიწყეთ შეწვა.

33. სალათის მომზადების დროს, ზეთი სულ ბოლოს დაამატეთ, რადგან მარილი ზეთში არ იხსნება.
34. შეწვის დროს, კარაქი რომ არ გაშავდეს, ტაფაში კარაქის ჩადებამდე, ცხელ ტაფას ზეთი მოუსვით და მხოლოდ ამის შემდეგ ჩადეთ კარაქის ნაჭერი.
35. საფუარიანი ცომი უფრო მალე გაფუვდება, თუ მასში რამდენიმე მილისებურ მაკარონს ჩაარჭობთ.
36. მაიონეზიან სალათებს და ვინეგრეტს განსაკუთრებული გემო ექნება, თუ სუფრაზე მიტანის წინ, ცოტა ხნით, შიგნით ლიმონის ქერქს მოათავსებთ.
37. სახლის ქათამი უფრო სწრაფად მომზადდება, თუ 30 წთ. ხარშვის შემდეგ, 5 წუთით ცივ წყალში ჩადებთ და შემდეგ ხარშვას გააგრძელებთ.
38. თევზის შეწვის დროს, მძაფრი სუნი თავიდან რომ აიცილოთ, თევზთან ერთად, ტაფაში უმი კარტოფილის რამოდენიმე ნაჭერი მოათავსეთ.
39. მოხარშული მაკარონის ზედაპირი მშრალი და წებოვანი რომ არ იყოს, ქვაბში ცოტა წყალი დატოვეთ, გადაწურვის დროს.
40. მოხარშული კარტოფილიდან ზედმეტი სითხის მოსაშორებლად, წყლის გადაწურვის შემდეგ, ქვაბს სახურავის ნაცვლად, ქაღალდის პირსახოცი დააფარეთ.
41. ხორცის შეწვისას, ტაფაში, 1 სუფრის კოვზი ფქვილი ჩაყარეთ და ხორცს კრატუნა ქერქი გადაეკვრება.
42. თევზის მომზადებისას, ზეთი ტაფას კი არა, თევზს უნდა წაუსვათ.
43. ხახვის მოთუშვის დროს, ცუდი სუნი რომ არ დადგეს, მარილი დაუმატეთ და ნელ ცეცხლზე დადგით.

44. შემწვარი ქათამი უფრო გემრიელი იქნება, თუ მას ბროწეულის სოუსით მოამზადებთ.

45. შემწვარი ხორცი გემრიელი და რბილი რომ იყოს, მომზადებისთანავე, ფოლგაში გაახვიეთ და ასე გააჩერეთ 10 წუთი.

მსოფლიოს 7 საუკეთესო შეფ-მზარეული, რომელთა შესახებ ყველამ უნდა იცოდეს

ჯეიმი ოლივერი
ბრიტანელი რესტორატორი, შეფ-მზარეული, შოუმენი, ცნობილია როგორც "შიშველი მზარეული". სწორედ ამ სახელწოდებით გამოვიდა მისი პირველი სატელევიზიო გადაცემა და შემდგომ ერთ-ერთი პირველი წიგნი ჯანსაღ და გემრიელ კვებაზე. ჯეიმი აქტიურად იბრძვის ერის სიჯანსაღისთვის, მიიჩნევს, რომ სწორედ ბრიტანელების კულინარული მისწრაფებებისგან იწყება იგი. წიგნები, სატელევიზიო გადაცემები, მსოფლიოს სხვადასხვა ქვეყნებში გამოსვლები - ეს გახლავთ ჯეიმის უდიდესი წვლილი ჯანსაღი კვების მსოფლიო ფილოსოფიაში. ოლივერი სამეფო სამედიცინო კოლეჯის საპატიო სტიპენდიანტია, ასევე ის საფეხბურთო კლუბის "მანჩესტერ სითის" შეფ-მზარეული გახლავთ.

გორდონ რამზი
ცნობილი კულინარული ტელეპროგრამების "ჯოჯოხეთური სამზარეულო", "დუღილის წერტილი", "კოშმარები რამზის სამზარეულოში" ავტორი და წამყვანი. სატელევიზიო კარიერის მიღმა, რამზი 10 რესტორნისა და 3 ბარის მფლობელია ინგლისში, ასევე 12 რესტორნის მსოფლიოს სხვადასხვა ქვეყანაში. მზარეულის პირველმა რესტორანმა - Gordon Ramsay at Royal Hospital Road - გახსნიდან 3 წელიწადში მიშლენის 3 ვარსკვლავი მიიღო. სხვა რესტორანმა Pétrus კი გახსნიდან 1 წელიწადში მიშლენის 1 ვარსკვლავი. ასევე გორდონ რამზი არაერთი წიგნის ავტორია, რომლებიც სხვადასხვა ქვეყანაში ბესტსელერი გახდა.


ალენ დიუკასი
ალენ დიუკასმა ბორდოს ერთ-ერთი სასტუმროს რესტორანში დამხმარედ მუშაობიდან ცნობილ შეფ-მზარეულამდე გრძელი გზა გაიარა. ის პროვანსული სამზარეულოს სპეციალისტი და წარმატებული რესტორატორი გახლავთ. დიუკასის რესტორნები ტოკიოში, მონაკოში, პარიზში, ნიუ იორკსა და ბეირუთში მდებარეობს. სწორედ ალენის დამსახურებაა, რომ მაღალი წრეების სამზარეულო გაცილებით მარტივი და გასაგები გახდა ადამიანებისთვის, რომლებიც ბოჰემისგან შორს არიან.
ალენ დიუკასის ფილოსოფია გახლავთ ტრადიციებზე დაფუძნებული შემოქმედება. დღესდღეობით იგი საფრანგეთის უმაღლესი ჯილდოს - საპატიო ლეგიონის ორდენის მფლობელია.


მარიო ბატალი
ამერიკელი მარიო ბატალი იტალიური სამზარეულოს სპეციალისტი, უამრავი წიგნისა და კულინარული გადაცემის ავტორი გახლავთ. უნივერსიტეტის დამთავრების შემდეგ მარიო რესტორანში Stuff Yer Face ჭურჭლის მრეცხავად მოეწყო, მაგრამ მალევე დაწინაურდა და მზარეული გახდა.
1985 წელს ბატალი სან-ფრანცისკოში გადავიდა საცხოვრებლად და სუში-ბარის შეფ-მზარეულად დაიწყო მუშაობა, მოგვიანებით კი სანტა ბარბარას ცნობილ რესტორანში La Marina-ში დაიმკვიდრა ადგილი. დროთა განმავლობაში მარიო ბატალის კულინარულმა შესაძლებლობებმა მთელ ამერიკაში გაითქვა სახელი და მას ყველაზე პრესტიჟულ რესტორნებში იწვევდნენ სამუშაოდ. 1993 წელს მარიომ თავისი პირველი რესტორანი გახსნა, სახელწოდებით Pо, ამჟამად მას რესტორანთა დიდი ქსელი აქვს.

ნობუიუკი "ნობუ" მაცუჰისა
ნობუ ცნობილია როგორც ფიუჟენ-სამზარეულოს აპოლოგეტი. ის თავის კერძებში კლასიკურ იაპონურ მოტივებს არგენტინული და პერუანული სამზარეულოების ინგრედიენტებს უთავსებს. შეფი იაპონიაში, პერუსა და არგენტინაში მუშაობდა და დღემდე იყენებს დაგროვილ გამოცდილებას ლოს-ანჯელესში, სადაც ამჟამად მოღვაწეობს. პირველივე რესტორნის Matsuhisa გახსნისთანავე, ნობუიუკი ქვეყნის საუკეთესო მზარეულების ათეულში მოხვდა. დღეს ყველა კრიტიკოსი და მაღალი სამზარეულოს მოყვარული აღნიშნავს, რომ ეს მზარეული ქმნის კერძებს, რომლის ანალოგი არ არსებობს.
რესტორანთა ქსელი Nobu, რომელიც მაცუჰისამ რობერტ დე ნიროსთან ერთად გახსნა, მსოფლიოს 17 ქვეყანაშია წარმოდგენილი.
მათ ცნობილი ადამიანები სტუმრობენ და ამით რესტორანს მეტად პოპულარულს ხდიან. ნობუმ 2 წიგნი გამოსცა, იგი რამდენიმე ფილმშიც გადაიღეს.

პოლ ბოკიუზი
ეს ფრანგი შეფ-მზარეული ცნობილია როგორც კულინარული კონკურსის "ოქროს ბოკიუზი" ხელმძღვანელი და ფრანგული მაღალი კულინარიის საზოგადოების დამაარსებელი. მისი სამზარეულოს ფილოსოფიის ძირითადი არსი გახლავთ პროდუქტების ნატურალური გემო, ახალი ინგრედიენტები, უბრალოებისა და პიკანტურობის შეთავსება თითოეულ კერძში, უარი სოუსებს, რომლებიც პროდუქტების გემოს ცვლიან.
პოლ ბოკიუზი ღვინოს აწარმოებს, არის რესტორნების მფლობელი, ატარებს ლექციებს, ხშირად გამოდის ტელევიზიით. რამდენიმე წლის წინ მას საპატიო ლეგიონის ორდენი მიანიჭეს ფრანგულ გასტრონომიაში შეტანილი წვლილისთვის. 1989 წელს სარესტორნო საპატიო გიდმა Gault Millau ბოკიუზს საუკუნის შეფ-მზარეულის წოდება მიანიჭა.


ვოლფჰანგ პაკი
ავსტრიული წარმოშობის შეფ-მზარეული ცნობილი გახდა კერძების მომზადების არასტანდარტული მიდგომით. ვოლფჰანგ პაკს აშშ-ში, იაპონიასა და კანადაში 20-ზე მეტი რესტორანი აქვს, ასევე რამდენიმე კულინარიული ბრენდი, მათ შორის Cut და ფასთფუდის ქსელი Wolfgang Puck Express. მისი ორიგინალური ბუტერბროდები მსოფლიოს უმსხვილეს აეროპორტებში იყიდება.
პაკი გრანდიოზულ ვახშმებს აწყობს კინოპრემიერებისთვის, მოდების ჩვენებებისთვის. სწორედ ვოლფჰანგ პაკია პასუხისმგებელი ოსკარის დაჯილდოების შემდგომ გამართულ ვახშამზე. შეფ-მზარეულმა 6 კულინარული წიგნი გამოსცა, აწარმოებს ნახევარფაბრიკატებს და სამზარეულოს მოწყობილობას.